Thursday, March 27, 2008

سنة أولى أمومة

هنتكلم المرة دي عن أهم الحاجات اللي لازم تتعمل أول لما الدكتور يبشرنا إن فيه بيبي جاي في السكة.

فأول حاجة لازم الأم تعملها إنها تشتري كتاب عن الأطفال والكتب دي موجودة في السوق، وبتعلمنا ازاي نتعامل مع الجنين يوم بيوم وخطوة بخطوة.. هاقول لكم على شوية معلومات قريتها في بعض الكتب عن الموضوع ده ..

أكل صحي لنمو أفضل وصحة حديد


الأكل مهم جداً بالنسبة للسيدة الحامل ولازم تاخد بالها من نوعية الأكلات اللي جسمها وجسم الجنين محتاج لها علشان تمده بكل العناصر والمواد اللازمة لنموه بشكل صحيح، وكمان يمدها بالقوة اللي تخليها تتحمل مشاق الحمل والولادة.

بالنسبة للأكل اللي المفروض السيدات الحوامل يبعدوا عنه:

1. تناول الشاي والقهوة.

2. الحوادق بمشتملاتها.

3. الأكلات المسببة للإمساك.

أما الأكل اللي المفروض يكتروا منه:

1. الخضروات وخصوصاً البروكلي والكرنب والخس.

2. الفاكهة الطازجة وخصوصاً التفاح.

3. شرب الماء بكثرة.

4. منتجات الألبان.

5. الفول.

6. عسل النحل.


تعملي إيه في الثلاث شهور الأخيرة...؟

الثلاث شهور دول اللي هم من السادس للتاسع يعتبروا مهمين جداً، طبعاً كل فترة الحمل مهمة إن الأم تاخد بالها من صحتها لكن في الثلاث شهور دول فيه حاجات مهمة جدا مطلوب من الأم الحامل إنها تعملها لأن الجنين بتكون حركته ابتدت، والأم بتحس بيه فهو كمان لازم يحس بيها.

فمهم جداً تبعد عن أي ضغوط نفسية في العمل أو في البيت، وتبتدي دايماً تكلم الجنين اللي في بطنها حتى لو كان عندها مشكلة ممكن تكلمه وتحكي له عنها، كمان تسمع موسيقى هادية دايماً... ولازم الزوج يشارك الزوجة في كل الحاجات اللي قلناها.

من ضمن الممنوعات في فترة الحمل استعمال صبغة الشعر، وكمان تحاول إنها تقلل من الماكياج، وكمان تحاول تبعد عن الألوان الغامقة وتركز على الألوان الفاتحة.

إيه أهم احتياجات المولود الجديد...؟

-1-
السرير

وياريت نحاول نجيب سرير مصنوع من الخشب، ويكون سرير مش للبيبي فقط يعني سرير كبير يكفيه حتى 5 سنوات، ويكون لونه فاتح ويفضل لون الخشب الطبيعي، ويكون له جنب متحرك لأنه ده بيساعد الأم في المرحلة الأولى إن الطفل يكون جنب أمه هو على سريره وهي على سريرها، وحتى لو كان بعيد عن الأم بنرفع الجنب ده فبيكون السرير أكثر أماناً، ويفضل أن يكون السرير مزوداً بأدراج من أسفل لتخزين حاجات الطفل.. كما أن المرتبة والجناب من أهم الحاجات اللي لازم نشتريها مع السرير.

-2-
البياض

ياريت نحاول ندهن الأوضة اللي هينام فيها الطفل باللون السماوي خصوصاً السقف ونبعد تماماً عن الألوان الغامقة والمنقوشة.

-3-
الإضاءة

ضروري تكون الإضاءة في غرفة الطفل جانبية ويفضل أن يكون فيها زر خاص للتحكم في شدة الضوء.

-4-
كرسي الطفل

لو الأب عنده سيارة خاصة يبقى لازم نشتري كرسي للطفل مخصص للجلوس في السيارة من أول يوم، أما لو مفيش سيارة فممكن نشتري carrycot أو سرير محمول للطفل عشان التنقلات بره البيت.

-5-
شنطة البيبي

لازم نشتري شنطة خاصة عشان نحط فيها كل مستلزمات الطفل من حفاضات وغيارات وببرونات فلازم تكون كبيرة وعملية ومريحة في حملها بحيث متسببش أي ارتباك أثناء التنقل...الخ.


-6-
الملابس

لازم تكون كل ملابس البيبي قطنية حتى البطانية لو كانت صوف لازم نبطنها قطن، ونبتعد تماماً عن أي أقمشة تحتوى على البوليستر أو الألياف الصناعية؛ لأن جلد الأطفال بيكون حساس جداً وبيتأثر بسرعة.

-7-
عربة الأطفال


دي أكتر حاجة بندفع فيها فلوس؛ لأننا بنستخدمها كتيررررر جداً فلازم يكون نوعها جيد وبيستحمل.

-8-
ألعاب الأطفال

لو فيه إمكانية لإحضار ألعاب للطفل فأنسب الألعاب له في الوقت ده الـBaby Jumper أو نطاطة وبتتركب في حلق الباب وبتكون محكمة وممكن مع الوقت تساعد الطفل على الوقوف.

-9-
بانيو الاستحمام

توجد أنواع كتيررر من البانيوهات بس أفضلها على الإطلاق الموجودة على الإستاند، وفيه نوع تاني بيتحط جوه البانيو.


-10-

مستلزمات ضرورية

الببرونات– ميزان الحرارة- تيتينه (بزازة)– شفاط للبن الأم– حفاضات– شامبو للبيبي- مقص للأظافر– فرشة شعر– سفنجة للاستحمام.

لا لبودرة التلك

من الأخطاء الشائعة جداً في مصر استخدام بودرة التلك أو الكريمات أو الزيوت عند التغيير للطفل، ولكن الصحيح هو استخدامها عند وجود تسلخات لدى الطفل فقط مش عمال على بطال.

ودايماً قبل ما نقفل الحفاض الجديد على الطفل لازم ندى له فرصة يتهوى وبعدين نقفل الحفاض النضيف وده بيدى له فرصه إن جلده يتنفس.


وفي النهاية أتمنى
إن كل سيدة حامل
تقوم بالسلامة

وتعلم ابنها الحب
من أول يوم في حياته

4 comments:

بثينــــــة said...

ازيك
عاملة إية
طبعا الموضوع رائع وبيفكرني بالذي مضي من زمان
فيه كام حاجة أحب أضيفهم لو سمحتيلي
أولهم بداية تغذية الطفل مع الرضاعة تدريجيا وغالبا دة بيبقي من الشهر الرابع
ممنوع شرب اللبن الحليب قبل سن سنة وممكن بالتدريج ويكون مخفف
وكمان شرب المياه المعقمة قطرات في الشهر التاني
كمان مراقبة نمو الطفل
واختبار كل حواسه
فيه كتب بتشمل كدة علشان تتأكد الأم إن الطفل بخير ولو فيه مشكلة تتعالج من بدري لأن العلاج بدري بيكون مطلوب أحيانا
كمان مراقبة وزن الطفل شهريا
فيه جداول لكدة
لأن دة دليل علي إنه بياخد غذاء كافي بالرضاعة الطبيعية أو بيحتاج لمساندة خارجية بلبن أطفال
زيارة الدكتور شهريا حتي لو الطفل كويس للاطمئنان في السنة الأولي
عمل فايل طبي للطفل فيه كل روشتاته وملاحظات الأم
دة بينفع في الطفل التاني
تجنب الطبيب المحب لإعطاء المضادات الحيوية بغزارة
وأخيرا
الاستماع لنصائح الأمهات القدامي في حدود وتشغيل العقل والحواس وتجنب العادات القديمة السخيفة تماما
بس كدة

Me2 said...

أهلا بثينة
و ميرسي بجد على إضافاتك القيمة و دايما مستنية ردودك

Rainbow said...

مدونتك رائعة
و فيها افكار و صورة جميلة جدا
بس للاسف فى مواضيع راحت منها الصور كان نفسى اتفرج عليها
زى موضوع الشنط
ياريت ترفعى الصور تانى

تحياتى

Me2 said...

العزيزة قوس قزح :)
للأسف الصور كانت كوبي من موقع تاني
لكن وعد أجمع مجموعة جديدة و أعرضها في موضوع جديد إن شاء الله
و أهلا بيكي