Monday, April 21, 2008

شم النسيم على طريقة شريف مدكور

أعتقد أن عيد شم النسيم من أقدم الأعياد المصرية وهو عيد فرعوني من أيام أجدادنا الفراعنة وكان اسمه "شيمو" وطبعا ملك شم النسيم هو الفسيخ أنا شخصيا بموت في الفسيخ وباكله بطريقة مختلفة تماما وهي إني بجيب الفطير المشلتت وبدهنه بسلطة الزبادي وأحط فيه حتة فسيخ وألفه زي سندويتشات الشاورما مع البصل الأخضر وبالهنا والشفا..

وعلى فكرة الفسيخ ده أكلة فرعونية جدا فأجدادنا الفراعنة كانت الأكلة الأساسية عندهم هي الفسيخ والبصل الأخضر لأنه بيدي طاقة كبيرة للجسم ونصيحة مني بعد ما ناكل الفسيخ ياريت ناخد قرص "فلاجيل" علشان يطهر البطن.

إزاي نقضي شم النسيم..؟



أنا مع إن العيلة كلها تتجمع في بيت واحد للاحتفال بهذا اليوم وممكن نعمل في البيت بعض الأفكار المختلفة يعني ممكن يكون عندنا سبت قديم من الخوص أو البامبو ممكن نرشه بالإسبراي الأصفر ونحط فيه ورق كوريشة أخضر ونحط فيه فطيرة شم النسيم أو البيض الملون..

أكلات شم النسيم

الملانا

من ضمن الحاجات اللي ممكن نجيبها لشم النسيم الملانا بس ناخد بالنا لأنها بتكون مليانة براغيت علشان كده يا ريت ننفضها كويس قبل ما ندخلها البيت لأن أنا حصل لي مأساة السنة اللي فاتت ودخلتها البيت من غير ما أنفضها وكانت النتيجة إني قعدت شهر مش عارف أنام..!!


البيض الملون

وبالنسبة لتلوين البيض لأنه بيدي بهجة للأطفال يا ريت يكون تلوينه بالألوان الطبيعية فلو عايزين اللون الأخضر الفاتح ده ممكن نحصل عليه من البقدونس، والبيج من قشر البصل، والأحمر من البنجر أو قشر الرمان، والبرتقالي الفاتح من الجزر، والبنفسجي الفاتح من قشر الباذنجان...

فطيرة شم النسيم

دلوقتي هقول لكم على طريقة عمل فطيرة شم النسيم في البيت..

المقادير:
كيلو دقيق.
ربع كيلو زبدة.
ربع زجاجة زيت ذرة.


خميرة (في حجم عين الجمل).
بيض مسلوق.
8 بيضات. 1/2 ملعقة صغيرة ملح.

الطريقة:
ينخل الدقيق مع الملح.. تدعك الخميرة بيرة مع السكر السنترفيش حتى تسيل ويضاف إليها الماء الدافئ، وتغطى، وتترك في مكان دافئ حتى تخمر.. يوضع نصف مقدار الدقيق في إناء العجين، ويضاف إليه الخميرة والبيض المخفوق قليلا، والزبدة السايحة ويقلب المقدار بالملعقة الخشبية من 4 إلى 5 دقائق حتى تتكون عجينة ملساء ناعمة.. يضاف باقي الدقيق ويعجن المقدار باللبن مع العجن باليد حتى تتكون عجينة ناعمة تترك جوانب العجينة.

يتم تغطية ترابيزة المطبخ بالدقيق، وتوضع فوقها العجينة وتلف باليدين جيدا حتى تصير العجينة ملساء لا تلتصق.. تكور العجينة وتوضع في إناء العجن بعد دهنه بالزبدة السايحة، وتغطى وتترك في مكان دافئ، وتترك حتى يتضاعف حجمها، وتخمر جيدا من 30 إلى 45دقيقة.

التشكيل:
يمكن تشكيل العجينة على أشكال مختلفة ووضع البيض الملون في الوسط بعد السلق، وتدخل الفرن، وبعد ما تخرج من الفرن وتبرد نرشها بالسكر البودرة.

الرنجة بالطحينة

المقادير:
سمكة رنجة مدخنة.
نصف كوب طحينة.


عصير 3 ليمونات.
فلفل أسود وشوية شطة حمراء.
2 ثمرة طماطم مقطعة قطع صغيرة. 3 بصلات خضر مقطعة حلقات ولو مفيش نستبدلهم ببصلة كبيرة مقطعة حلقات صغيرة.

الطريقة:
نشوي الرنجة على النار مباشرة بدون إناء إلى أن يتشقق الجلد تماماً نخليها من الأشواك ونقطعها قطع صغيرة.

نخلط باقي المقادير مع بعض وبعد كده نضيف ليهم الرنجة وبألف هنا وشفا

السردين

أحسن طريقة لعمل السردين هو إنك تنضفيه كويس من القشرة وتنضفيه كويس من جوه وبعد كده تقسميه قسمين وترشي عليه زيت وليمون.

وأنا بفضل أننا نجهز السردين قبل يوم شم النسيم بيوم علشان يتنقع في الزيت والليمون كويس وبالتالي تقل نسبة الملوحة فيه

كوكتيل شم النسيم

طبعا دلوقتي فيه فاكهة كتير موجودة في السوق علشان كده ممكن نعمل الكوكتيل ده..

المقادير:
موز
كيوي
فراولة
ملعقة كبيرة قشطة

نصف كوب آيس كريم فانيليا
1/2 كوب لبن حليب محلي

الطريقة:

قشري الموز والكيوي وقطعيهم وضيفيهم إلى الآيس كريم واللبن الحليب والقشطة والفراولة واضربيهم في الخلاط وبعد كده صبيهم في كاسات وحطيهم في التلاجة لمدة ساعة وبعد كده قدميهم وبألف هنا وشفا.


لو عايزين يوم مختلف


ولو عايزين اليوم يكون مختلف ممكن نخلي مفرش السفرة لونه أخضر ونجيب قماش أصفر ونقصقصه على شكل كتاكيت ونلزقه على المفرش بمسدس الشمع وكمان في اليوم ده يا ريت نحط في كل فازات البيت ورد طبيعي..

ولو واحد رايح لخطيبته يوم شم النسيم ممكن ياخد لها هدية عبارة عن أرنب أبيض ويحطه في سبت سلك أبيض في أصفر.

المصدر: بص و طل

7 comments:

Sampateek said...

الله افكار جميلة جدا و بوست ظريف قوي قوي بصوره و مواضيعه

بس تعرفي انا لو كان جوزي ايام ما كان خطيبي جابلي ارنب ابيض و هو جاي كان ممكن ماما تحدفه من البلاكونة هو و الارنب و القفص

هههههههههههه
انا اشكر شقير اللي عرفني مكان مدونتك

تحياتي

la3lahakhier said...

يا شيخة انتى سكر
وكمان بتحبى الفسيخ دا ايه التناغم ده
لعلمك بقى انتى عششت فى نافوخى
ماتيجى نعمل مجلة نسائية مع بعض ايه رايك

اسكندراني اوي said...

امممممممممممممممممممم
يا بختكو بس برضه حدور على فسيخ ورنجه في الدوحه واكلهم
بس للاسف مش حعرف اعمل كل ده
لكن اهو حاجه من ريحه الحبايب
كل سنه وانتم طيبين

Me2 said...

أهلا بيكي يا سمباتيك
إنتي عارفاني من زمان بس الدنيا بتنسينا :)

لعلها خير:
بموت فيه بس مش هقدر أكله السنة دي علشان الحمل :)

إسكندراني قوي:
فيه طريقة لعمل الفسيخ هدور عليها

Rainbow said...

افكار جميلة اوى
انا ساعات لما يكون معنديش وقت لتلوين البيض بلفه فى ورق ملون بتاع الهدايا و اربطه بشريطة ستان او اورجانزا


تحياتى و كل سنة وانتى طيبة

sendbad said...

كل سنة وانتي طيبة مدونة جميله وخفيفة
تحياتي الخالصة

Me2 said...

rainbow
فكرة الورق الملون والشرايط فكرة روعة و أمان أكتر من الالوان

sendbad
شكرا للمرور