كى تضمنى وقاية فعالة من الشمس

مشكلة بنلاقيها كتير هى اهمال البعض فى وضع واقى الشمس...فى ناس بتقول ان المشكلة ان بشرتهم دهنية...و ناس تانية مش بتواظب عليه مش لاكتر من عدم اهتمام و اهمال النقطة دى

بس لازم نوضح حاجة...ان كريمات الوقاية من الشمس مش بس بتساعد انك مش تسمرى...بالعكس دى اهم مهمة ليها هى حماية بشرتك من اشعة الشمس اللى هتسببلك من كتر التعرض ليها تجاعيد البشرة...و ظهور البقع و الكلف و النمش...بالاضافة انها بتقلل نسبة احتمال حدوث سرطان الجلد اللى كتير بيبقى سببوا التعرض المستمر للشمس بدون وضع كريمات واقية

يبقى احنا دة اتفقنا ان واقى الشمس مش بس علشان منسمرش...بالعكس دى عادة صحية لازم نتعود عليها فى ظل التلوث اللى الطبيعة بتتعرض له و فى ظل وجود ثقب الاوزون...اللى بيساعد على زيادة مخاطر الشمس عل البشرة

تانى حاجة هى ان كريمات الحماية من الشمس فى منهم لانواع البشرة المختلفة و منها الدهنية...و لو لاقيتى صعوبة فى انك تلاقى كريم حماية محدد لنوع بشرة معينة...هتلاقى بسهولة كريمات لجميع انواع البشرة...و مش تفتكرى انهم بيضحكوا عليكى لما يقولوا لجميع انواع البشرة...بس انتى بس جيبى ماركة مضمونة...زى مثلا نيفيا...كريم الحماية بتاعها هايل جدا

دلوقتى اخر حاجة بس هاقولهالك هى ارشادات فى وضع كريم الوقاية علشان تضمنى حماية اكيدة



1- هتستعملى كريم الحماية على البشرة قبل نزولك ب15 او 30 دقيقة...و اوعى تستعمليه قبل ما تنزلى على طول لان زى مانتى هتلاحظى ان كريمات الحماية من الشمس بتبقا تقيلة فهتحتاج وقت علشان البشرة تمتصها علشان تدى حماية فعالة

2- لو بشرة وجهك حساسة و سريعة الاحمرار فيستحسن انك تستخدمى ليها كريم حماية خاص بالوجه...لكن لو غير كده فأكيد عادى ان كريم الحماية اللى بتستخدميه لجسمك يبقى هو نفسه تستخدميه لوجهك

3- لو هتنزلى البحر او حمامات السباحة هتحطى على جسمك طبقة معقولة و متساوية من الكريم الواقى و مفيش داعى ابدا انك تخلصى علبة الكريم كلها عيكى اعتقادا منك انه كدة بيدى حماية افضل...و نصيحة حطى الكريم على جسمك كله الاول و بعدين البسى المايوه علشان تتحركى براحتك و تضمنى ان جسمك كله محمى من الشمس

4- هتكررى وضع كريم الحماية كل ساعتين لو كنتى فى خروجة عادية...و كل نص ساعة لو كنتى بتلعبى رياضة او بتبذلى مجهود بيسبب انك تعرقى...علشان اختلاط المية بكريمات الحملاية بيقلل من مفعولها فلازم نكرر وضعه كل نص ساعة

5- لو كنتى خارجة عادى زى كل يوم استخدمى كريم درجة حمايته على الاقل 15...و لو كنتى رايحة منطقة زى البحر او اى مكان نسبة التعرض فيه للشمس عالية استخدمى على الاقل درجة حماية30

6- طبعا كل ما درجة الحماية زادت كل ما كان الكريم فعال اكتر و كل ما سعرعه زاد فانتى تختارى اللى يناسبك بس مع مراعاة برده اللى انا قلته فى رقم5


7- SPF هى درجة الحماية هتلاقيها مكتوبة على العلبة