Saturday, August 04, 2007

أنا زهقت... إتعلموا إزاي تلبسوا


الموضوع ده شر لا بد منه
شفت العجب و انا قاعده في المول بتفرج على طريقة لبس البنات و الستات... المسألة مبقتش مجرد إتباع الموضة ... المسألة بقت تقليد أعمى بدون فهم!!!!!

و نقول يمكن الكلام يفيد حد

ميصحش واحدة عندها بطن بارزة (وده حال معظم المصريات مش المتزوجات فقط بل و البنات أيضا) و تصر تلبس بودي مع بنطلون لو-يست ... طبعا أكيد كلنا شفنا المنظر إزاي

ميصحش واحدة ممتلئة في منطقة الارداف و تصر تلبس بنطلون بجيوب من الخلف

ميصحش بردو تكون واحدة ممتلئة في منطقة الأرداف او البطن و تلبس الفستان القصير بوسط ساقط

ميصحش واحدة ممتلئة عموما و تلبس سكيني جينز أو ليجينجز (برمودا ضيقة) مع بلوزة قصيرة
و عامة السكيني جينز و الليجينجز بالأخص معمول للفتيات ذوات الجسم المتناسق جدا يعني مينفعش تلبسه واحده رفيعة أو ممتلئة

ميصحش واحدة محجبة تلبس بدي و خاصة اللي بلون اللحم... إيه لازمة الحجاب هنا مش فاهمة و اللي يرضي أهلك إنك تلبسي كده أكيد مش هيمانعوا تقلعي الإيشارب احسن

ميصحش واحدة تلبس فستان بوسط نازل و تمشي تتقصع وتترقص!!!!

ميصحش تكوني خارجة تعملي شوبينج و تحطي ماكياج حفلات... خليكي بسيطه

ميصحش تلبسي ملابس داخلية بألوان لافتة و إنتي لابسة أبيض إلا إذا كنتي (ولامؤاخذه)

ميصحش تكوني لابسة إيشارب مسمياه حجاب ولابسة قصير و نص كم!!!!!!

ميصحش تلبسي منقوش نقشات كبيرة أو مخطط بالعرض إذا كنتي ممتلئة

ميصحش تكوني ممتلئة و لابسة كرانيش و كشاكيش و خاصة في منطقة الصدر و الأرداف

ميصحش تلبسي لبس خارج بمعنى (خليع - شفاف - محزق- عريان) في مكان عام يتواجد فيه ناس محافظة و خليه للأماكن الخاصة و اللي بينك و بين ربنا .. ربنا اعلم بيه

وفي نفس الوقت ميصحش تلبسي كل ما تمليه عليكي الموضة بدون ما تشغلي عقلك اللي ربنا خلقه ليكي

أكيد فيه المزيد بس مش جاي على بالي دلوقتي
يمكن يكون للموضوع بقية

7 comments:

Қhawlằh said...

شر البلية ما يضحك..

هو صحيح كل واحد حر في نفسه و لبسه, لكن في مناظر تعتبر من شناعتها تعدي على الغير و ازعاج لعيون الناس..

و المزعج اكتر هو حكاية الحجاب الي بدون كم دا..

الله يعين!

Me2nour said...

للأسف دي أحوال بلدنا و المجتمع العربي عموما
مبقاش فيه اي تقدير لذوق أو أصول
فعلا زي ما بتقولي كل واحد حر في نفسه لكن الحرية يجب أن تقف عند حرية الآخرين حريتك داخل بيتك مش بجاحة بين الناس
شكرا لمرورك و إهتمامك بالرد

loversokara said...

فعلا عندك حق والله الموضوع بقي لا يحتمل أنا لما بكون ماشية مع اخواتي الولاد ف الشارع بأكون مكسوفة جدا من المناظر اللى باشوفهاوعلي فكرة الموضوع ده بردو من قلة الوازع الديني ف بلدنا والتقليد الأعمى للغرب.اللهم ثبت ايمان جميع المسلمين يارب العالمين

Anonymous said...

ميه ميه الكلمتين دول والله كانزا محشورين فى زورى يارب يبطلوا بقى

Bella said...

تسلم ايديكي

بقالي فترة نفسي اقول الكلمتين دول وح اطق من جنابي من المناظر الفظيعة اللى باشوفها واللى مالهاش اي علاقة لابالأناقة ولا الشياكة

ليه يعني لازم اللبس يكون مبتذل ونتصور انه شيك علشان هو موضه

مش كل موضه تليق علي جسمنا
ولا كل موضة تليق على سننا
ولا كل موضة تليق على بيئتنا

البطون العارية والأذرع العارية ايضا

والمحزق والملزق انتشر بشكل مخجل

الواحد بيتكسف لهم صراحة

Dr. Hussein said...

مع انى راجل الا انى كلامك شدنى جدا جدا ,ولقيتك بتعبرى عن حاجات فعلا عايز اعترض عليها خصوصا موضوع الحجاب او الايشارب اللى ملوش علاقه بباقى اللبس حاجة مش ممكن و زى مانتى قولتى ان فى ناس (لا مؤاخذه) طب دول معروفين من ااساليبهم انما البنات المراهقات يقلدوا دول و يطمعوا الشباب فيهم فدى حاجة تدعوا للاسف ---و لو البنت غبية و هايفة و الام غبى و فرحانه ان بنتها بقت مزة لكن الاب و الاخ اللى فاهم و عارف اللى بيحصل بره يبقوا ايه (متهياللى لالالالالا مؤاخذتين)و ربنا يصلح الحال
تحياتى
على فكرة انا هبقى زبون هنا لو ده مايضايقش حد
لو حيضايق ياريت تقولوليلى
سلام

Me2nour said...

أنا بشكر كل اللي علقوا على الموضوع
و كلامكم لوحده يكفي و لا يحتاج لتعليقي
و أهلا بالجميع