النحافة ... معلومات و حلول

النحافة هي نقص الوزن عن المعدل الطبيعي، سواء كان النقص ده قليل أو كثير..
وللنحافة أعراض كتير قوي بتكون مصاحبة لقلة الوزن زي مثلا شحوب الوجه، أو الهالات السوداء اللي ممكن تظهر تحت العين، أو تساقط الشعر بصورة غير طبيعية، أو الصداع المستمر بدون وجود سبب محدد، أو الدوخة والإحساس بالتعب والإرهاق مع بذل مجهود بسيط...

ولو عايزة تعرفي إذا كنتِ نحيفة ولا لأ..
فيه عملية بسيطة ممكن تعمليها وهي إنك تطرحي 100سم من الطول فيكون المقدار الباقي هو الوزن الصحيح المناسب لك، ويكون محسوباً بالكيلوجرام، فمثلا لو كان طولك 170سم يبقى وزنك المناسب 170- 100= 70 كيلوجراماً وطبعا لو وزنك نقص عن كده فتعتبري نحيفة..

أسباب النحافة

أولا: سوء التغذية

على فكرة سوء التغذية هنا مش المقصود منه قلة الكمية اللي بتحصلي عليها من الأكل.. لكن المقصود منها هو أنك مش بتتناولي أطعمة متنوعة تحتوي على كافة العناصر الغذائية اللي جسمك محتاج ليها زي الفيتامينات والأملاح والبروتينات والنشويات وبالتالي ممكن تصابي بالنحافة...

أو بتكون نتيجة لاتباع بعض العادات الغذائية السيئة زي مثلا شرب الشاي بعد الأكل مباشرة وبالتالي حرق كل العناصر الغذائية اللي كانت موجودة في الأكل علشان كده يا ريت تخلي شرب الشاي ده بعد مرور ساعتين من الأكل..

ثانيا: شرب الميه بكثرة أثناء الأكل

ممكن تكوني من الناس اللي بتحب تشرب ميه كتير أثناء الأكل سواء "مياه عادية أو مياه غازية "... وبالتالي بتحسي بالشبع بسرعة من غير ما تحصلي على الوجبة الغذائية الكاملة اللي جسمك محتاج لها...

ثالثا : اتباع نظام رجيم خاطئ

ممكن تكوني كنتِ بتعاني من زيادة في الوزن وعملتِ نظام رجيم بس كان زيادة عن اللزوم لغاية ما وصلتِ لدرجة النحافة وبعد كده مش عارفة ترجعي للوزن الطبيعي أو المثالي من جديد..

رابعا:الوراثة

ممكن تكون النحافة مرض وراثي في العائلة.

خامسا: الإصابة ببعض الأمراض العضوية

من الأسباب اللي ممكن تؤدي إلى حدوث النحافة الإصابة لا قدر الله ببعض الأمراض العضوية زي أمراض "فرط الغدة الدرقية" أو "فقر الدم الشديد" أو بعض أمراض الجهاز الهضمي اللي تمنع امتصاص الطعام المهضوم" أو الإصابة ببعض الأورام..
وفي الحالة دي لازم استشارة طبيب علشان يحدد لك العلاج المناسب والنظام الغذائي المناسب علشان تمشي عليه.

سادسا: القلق والتوتر زيادة عن اللزوم

ممكن تكوني من الناس العصبية زيادة عن اللزوم أو اللي بتفكر كتير وبالتالي الأمر ده يؤثر عليك جدا وبيخليكِ تفقدي شهيتك أو تاكلي وترجعي الأكل تاني، وبالتالي جسمك مش بيحصل على الغذاء المناسب اللي محتاج له.

نصائح لعلاج النحافة

النصيحة الأولى
ارفعي شعار "أنا بحب كل أنواع الطعام"

شوفي يا ستي لو عايزة فعلا تتخلصي من النحافة يبقى لازم ترفعي شعار "أنا بحب كل أنواع الطعام" وسيبك بقى من كلمة أنا بحب ده وبكره ده... لأن الكلمة دي مش مفيدة وبتخليكي تحرمي نفسك من أنواع مفيدة من الطعام جسمك محتاج ليها.

ويا ريت كمان تحرصي إن الوجبة الواحدة تكون مكتملة العناصر الغذائية، من بروتينات وحديد ونشويات وخضروات.

ودي الأطعمة اللي المفروض تحرصي على تناولها :
- الخبز الطازج بجميع أنواعه سواء كان عيش بلدي أو فينو.
- النشويات زي "المكرونة - الأرز - البطاطس - المحشي-الكشري- البطاطا".
- الألبان ومشتقاتها زي "الجبنة-القشطة-الأرز باللبن–المهلبية".
- المسليات: "السوداني - واللب – والمكسرات بأنواعها".
- البروتينات: "البيض - اللحوم – الأسماك".
- المشروبات والعصائر سواء كانت المياه الغازية أو العصائر الفريش.
- الفاكهة بكل أنواعها زي "الموز-المانجو-العنب-التين–البلح".
- البقول زي " الفول-العدس- اللوبيا–البسلة".
- المشهيات أو المقبلات "الفلفل-والبهارات–المخللات".
- الحلويات زي " الجاتوه-البسبوسة- العسل-الحلاوة–الطحينية".

النصحية التانية
حاولي تفتحي نفسك على الأكل بأي طريقة

عادة ما يكون المصابون بالنحافة نفسهم مش بتكون رايحة للأكل قوي ومع أي حاجة بسيطة بيحسوا إنهم شبعوا علشان كده يا ريت تحاولي تفتحي نفسك على الأكل بأي طريقة عن طريق مثلا:

-أنك تخلي دايما على السفرة موجود أي حاجة من المقبلات اللي ممكن تفتح نفسك، وكمان تساعدك على هضم الأكل بسرعة، والمقبلات دي زي "طبق السلطة الخضراء" أو "سلطة بابا غنوج" أو "سلطة الطحينة" وعلى فكرة ممكن كمان تضيفي البهارات والأعشاب إلى الطعام علشان تدي الأكل نكهة حلوة تفتح نفسك عليه.

1. تجنبي نهائي الحديث أثناء الطعام عن أي مشكلات أو أخبار سيئة أثناء الأكل.

2. كلي بالراحة لأن الأكل بالراحة هيخليكِ تشعري إنك لسه ما شبعتيش.

3. بلاش تاكلي قبل الأكل أي نوع من أنواع الحلويات لأن ده ممكن يسد نفسك عن الأكل وخلي ياستي أكل الحلويات دي بعد الانتهاء من تناول الطعام.

4. احرصي على تناول الطعام من وقت للتاني في أماكن مفتوحة ويا سلام بقى لو مع مجموعة من أصحابك وعلى فكرة الأكل وسط مجموعة مفيد جدا لأنه بيساعد على الأكل أكتر وأكتر وده اللي احنا عايزينه طبعا...بس لو مش هتقدري تخرجي وتاكلي بره في مكان مفتوح ممكن تغيري المكان اللي أنت بتاكلي فيه في البيت من وقت للتاني علشان تكسري حاجز الملل من الأكل..

النصيحة التالتة
تنظيم مواعيد الوجبات

ولو عايزة فعلا تتخلصي من النحافة يبقى ياريت تراعي موضوع تنظيم مواعيد الوجبات وده لأن عدم تنظيم مواعيد الوجبات ممكن يخليكي تهملي وجبة أو اتنين وده بيؤثر جدا على الجسم..

وعلى فكرة فيه حاجة حلوة قوي ممكن تعمليها لو كنت من الناس اللي مالهاش تقل قوي على الأكل ممكن تاكلي على قد ما تقدري في الوجبات الأساسية "الفطار والغداء والعشاء" لو حسيت إنك جعانة بين كل وجبة والتانية ممكن تاكلي تاني وده لأن تناول 6 وجبات صغيرة أفضل من وجبتين أو تلاتة كبار لأنه بيكون أسهل في عملية الهضم والامتصاص وأكتر فائدة في زيادة الوزن.

النصيحة الرابعة
عدم شرب الميه قبل أو أثناء الأكل

ياريت ما تشربيش ميه قبل الأكل أو أثناء الأكل وده علشان ما تسديش نفسك عن الأكل... وخدي بالك برضه لو كنت من الناس اللي بتحب تشرب مياه غازية أثناء الأكل إن ده مضر جدا لأنك كده بتملأي معدتك بالميه على الفاضي...وابقي اشربيها بعد الأكل على الأقل حتى علشان تساعدك على الهضم.

النصيحة الخامسة
كتري من العصائر الفريش

حاولي إنك تكتري من شرب العصائر الفريش لأنها مفيدة جدا وبتساعد كمان على الهضم بسرعة خاصة عصير البرتقال..
وفيه حاجة يا ريت تستبدلي العسل بدل من السكر مع المشروبات السخنة اللي بتشربيها.
كمان يا ريت تشربي كل يوم بالليل كوباية كبيرة لبن سادة أو لبن بكاكاو.

النصيحة السادسة
استشارة الطبيب لو لزم الأمر

لو كنت ملاحظة إن وزنك فيه نزول مستمر ومفيش أي زيادة بالرغم إنك بتاكلي كويس ومش عارفة إيه السبب يبقى يا ريت تستشيري دكتور علشان ممكن يكون عندك أي مرض عضوي هو اللي مسبب لك الحالة اللي أنت فيها دي أو يكون عندك ديدان اللي ساعات كتير بتكون هي سبب النحافة.

كمان لو كنت على طول بتحسي إنك شبعانة ومش جعانة ممكن تستشيري دكتور وهو هيقولك على دواء فاتح للشهية مثل فيتامين ب 6.

النصيحة السابعة
ممارسة الرياضية

زي ما ممارسة الرياضة مهمة لتقليل الوزن فهي مهمة برضه لزيادة الوزن... وخاصة رياضة المشي علشان كده يا ريت تحرصي على ممارسة الرياضة ولو يمكن حتى إنك تمشي كل يوم لمدة ساعة.

وصفات لعلاج النحافة

وصفة حب العزيز

المكونات:
• حب العزيز.
• حلبة مطحونة.
• مكسرات "لوز أو فستق".

الطريقة:
كل اللي عليك إنك تجيبي حب العزيز، وتطحنيه وتضيفي إليه حلبة مطحونة ومكسرات زي "اللوز أو الفستق" بعد كده تضيفي الخلطة دي إلى كل كوباية لبن أنت بتشربيها لمدة شهر كامل أو أقل شوية.

وصفة المكسرات بالعسل

المكونات:
• لوز
• جوز
• تمر
• عسل

الطريقة:
كل اللي عليك إنك تجيبي لوز + جوز + تمر + عسل وتخلطيهم وتعمليهم على شكل كور وتاكلي منهم 3حبات يومياً لمدة شهر.

وصفة الحلاوة الطحينية

المكونات:
• معلقتين حلاوة
• علبة صغيرة زبادي

الطريقة:
ضيفي معلقتين الحلاوة الطحنية إلى علبة الزبادي وكلي كل يوم الصبح أول ما تصحي من النوم، جربي الوصفة دي يوميا لمدة أسبوعين وأنت تشوفي الفرق بنفسك.

وصفة لعلاج نحافة الوجه

لو كنتِ من الناس اللي بتعاني من إن وجهك رفيع، فدي وصفة هايلة جدا هتساعدك على علاج المشكلة دي وكل اللي عليكِ إنك تاكلي كل يوم 5 حبات زبيب... وتشربي بالليل كوباية عصير كيوي...كرري الوصفة دي لمدة شهر وإن شاء الله تلاقي نتيجة هايلة.

وصفة الحلبة

على فكرة الوصفة دي مهمة جدا ومفيدة خاصة لو كنت بتعاني من النحافة الشديدة في منطقة الأرداف أو الصدر فالوصفة دي هتساعدك على الحصول على النتيجة اللي أنت عايزاها.

المقادير:
• 5 ملاعق حلبة.
• 3 ملاعق سكر.
• معلقة عسل أسود.
• 4 كوبايات ميه.

الطريقة:
اغلي الميه كويس وبعد كده ضيفي إليها العسل الأسود وسيبيه على النار لمدة 10 دقائق مع التقليب المستمر، وبعد كده ضيفي الحلبة، وسيبيهم على النار لمدة 5 دقائق بعد كده شيليها من على النار وحطيها في كوباية، وضيفي إليها السكر واشربيها وهي سخنة... ممكن تعملي الوصفة دي كل يوم وتشربيها بالليل قبل ما تنامي لمدة 3 أسابيع..

وصفة السمسم

المقادير:
• مقدار فنجان قهوة مليان سمسم

الطريقة:
الطريقة دي مفيش أبسط منها وهي إنك تاكلي كل يوم مقدار فنجان قهوة مليان سمسم لمدة أسبوعين وأنت تشوفي النتيجة بنفسك وده لأن السمسم مليان زيوت مفيدة جدا للجسم وكمان بيساعد على نعومة البشرة..

نظام غذائي لعلاج النحافة

الفطار :-
• 2بيضة مقلية في السمنة أو في الزيت أو طبق فول مدمس بالزيت أو بالسمنة أو طعمية أو أي نوع من أنواع الجبن.
• 1/2رغيف خبز بلدي.
• كوب كبير بليلة باللبن والزبيب والفانيليا والسكر أو كوب كبير شاي باللبن أو نسكافيه باللبن كامل الدسم محلى بثلاث معالق سكر.
• ساندوتش مربى أو عسل.
• أي نوع فاكهة موجودة عندك.

في الفترة بين الفطار والغداء ممكن تاخدي
كوب شاي باللبن مع قطعة كيك أو 4 بسكويتات أو عصير برتقال محلى بالسكر أو آيس كريم أو زجاجة مياه غازية.

الغداء:-
• ربع دجاجة محمرة أو ثمن كيلو لحمة أو نصف كيلو سمك مقلي .
• طبق خضار مطبوخ .
• رغيف خبز أو طبق رز أو مكرونة أو طبق محشي أو بطاطس محمرة.
• طبق صغير سلطة خضراء.
• طبق الحلو يكون طبق رز باللبن أو قطعتين أو تلاتة بسبوسة أو كريم كرامل.

في الفترة ما بين الغداء والعشاء ممكن تاكلي
• ساندوتش جبنة.
• شاي باللبن مع قطعة جاتوه أو كيك.

العشاء :-
• قطعة كبيرة لحمة محمرة أو ربع دجاجة محمرة أو جبنة مع خبز .
• ساندويتش مربى بالقشطة أو عسل أبيض أو عسل أسود مع طحينة.
• كوب لبن.
• فاكهة أو أي عصير فريش.

وعلى فكرة النظام ده فيه مرونة يعني ممكن تكتري في الأكل زي ما أنت عايزة مفيش مشكلة

المصدر:بص وطل